ក្រោយ​រស់​ជាមួយ​រូបរាង​ទម្ងន់​ ១៣០​គីឡូ២០​ឆ្នាំ ហើយ​ត្រូវ​ពេទ្យ​ប្រាប់​ថា អាច​ដាច់​សរសៃ​ឈាម​ស្លាប់​គ្រប់​ពេល​នោះ នារី​ឈ្មោះ Truong Thi Y Nhi បាន​សម្រេច​ពុះពារ​ដើម្បី​ការពារ​ជីវិត​ខ្លួន​ឯង។

កាល​ពី​ថ្ងៃ​ទី ១៥ ខែ​មីនា​កន្លង​ទៅ​នេះ បណ្ដាញ​ព័ត៌មាន Vnexpress បាន​រាយការណ៍​ថា CEO របស់​ក្រុមហ៊ុន​គ្រឿង​សំអាង​មួយ​បាន​ស្រក​គីឡូ​ពី ១៣០​គីឡូ ចុះ​សល់​ត្រឹម​៦០​គីឡូ​ក្រោយ​មួយ​ឆ្នាំ។ តាម​នោះ​ដែរ កាល​ពី​នៅ​ក្រមុំ នាយក​ក្រុមហ៊ុន​​ដែល​មាន​ឈ្មោះ Truong Thi Y Nhi មក​ពី​ទីក្រុង​ហូជីមិញ មាន​គីឡូ​ត្រឹម​តែ​៥០​ប៉ុណ្ណោះ ជាមួយ​កម្ពស់ ១.៦០ម។

យ៉ាងណាក្ដី ក្រោយ​ពេល​មាន​គ្រួសារ គួប​ផ្សំ​ជាមួយ​ស្ត្រេស​ពី​ការ​រកស៊ី និង​មើល​កូន​នោះ បាន​ធ្វើ​ឲ្យ​អ្នក​ម្ដាយ​រូប​នេះ ឡើង​ទម្ងន់​លែង​គ្រប់គ្រង​បាន។ នារី​អាយុ ៤៤​ឆ្នាំ​​នៅ​ចាំ​បាន​ថា នៅ​ឆ្នាំ​២០២០ ពេល​ទៅ​ពិនិត្យ​សុខភាព គីឡូ​របស់​នាង​បាន​កើន​ឡើង​ដល់ ១៣០​គីឡូ ហើយ​ក៏​ជា​ពេល​ដែល​នៅ​ពេល​ទៅ​ស្រុក ម្ដាយ​របស់​នាង ស្គាល់​តែ​ប្ដី​នាង ហើយ​មើល​នាង​លែង​ស្គាល់ ព្រោះ​នាង​ធាត់​ខ្លាំង​ពេក។

ពេទ្យ​បាន​ប្រាប់​ថា​ នៅ​ក្នុង​ខ្លួន​របស់​នាយក​ក្រុមហ៊ុន​រូប​នេះ គឺ​មាន​ឈាម​កក​ក្នុង​សរសៃ​ឈាម ថ្លើម និង​ក្រលៀន​ដំណើរ​ការ​លែងល្អ ហើយ​ជា​ពិសេស​នោះ នាង​អាច​ដាច់​សរសៃ​ឈាម​គ្រប់​ពេល​ជាមួយ​គីឡូ​របស់​ខ្លួន។ ដោយ​ខ្លាច​ត្រូវ​ស្លាប់​ចោល​ប្ដី និង​កូន នារី​កើត​ឆ្នាំ ១៩៧៨ បាន​ចាប់​ផ្ដើម​សម្រក​គីឡូ ដោយ​វិធី​សាស្ត្រ​របស់​នាង​នោះ​គឺ​ផ្ដោត​ទៅ​លើ របប​អាហារ​បស់ខ្លួន ដោយ​នាង​ចាប់​ផ្ដើម​ញ៉ាំ​បន្លែ​ច្រើន​ជាង​មុន​ ហើយ​កាត់​បន្ថយ​សាច់ របស់​ផ្អែម និង​ខ្លាញ់។

ដោយ​សារ​តែ​មិន​ទម្លាប់​ញ៉ាំ​បន្លែ​ ហើយ​ឧស្សាហ៍​ឃ្លាន​ផង​នោះ ទើប​ធ្វើ​ឲ្យ​នាង​ត្រូវ​ផឹក​ទឹក​មួយ​កែវ​ធំ​រាល់​ពេល​ឃ្លាន​ខ្លាំង​ពេក។ ជាមួយ​ការ​ព្យាយាម​របស់​ខ្លួន CEO ខាង​លើ​​បាន​ស្រក​បាន ៧០​គីឡូ ដោយ​នៅ​ពេល​នេះ នាង​នៅ​សល់​តែ​៦០​គីឡូ​ប៉ុណ្ណោះ គឺ​ធ្ងន់​ជាង​ពេល​នៅ​ក្រមុំ​១០​គីឡូ។ នាង​ក៏​ចែក​រំលែក​ដែរ​ថា ពេល​នេះ​នាង​គេង​​លែង​ភ្ញាក់​កណ្ដាល​យប់​ព្រោះ​ខ្លាច​ស្លាប់​ដូច​មុន​ទៀត​ហើយ៕