ពាក្យ ១ ឃ្លាៗ របស់ភរិយា តែងធ្វើឲ្យស្វាមីមានសម្ពាធខ្លាំង

2017-04-25 23:41:16
ចំនួនមតិ 0 | ចំនួនចែករំលែក 0

តើស្ត្រីជាភរិយាមានដឹងអត់ថាពាក្យមួយឃ្លានោះជាអ្វី? អានពីការលើកឡើងរបស់ស្វាមី ទាំង ៥ រូបខាងក្រោម នោះយើងនឹងដឹងថា សម្ពាធរបស់ដៃគូជាអ្វី៖

១.សុភក្ត្រា៖ «ប្រពន្ធខ្ញុំឲ្យតែមានរឿងអីបន្តិចតែងយកសម្ដី១ឃ្លានោះមកគ្របលើខ្ញុំជានិច្ច គឺថា “ប៉ាម៉ាក់មិនដែលធ្វើឲ្យខ្ញុំទាស់ចិត្តឡើយ”។ ពេលខ្លះខ្ញុំក៏ចង់ប្រាប់ទៅគាត់វិញដែរថា “ប៉ាម៉ាក់ខ្ញុំក៏មិនដែលធ្វើបែបនេះដាក់ខ្ញុំដូចគ្នាដែរ”។ គាត់ធ្លាប់ជាកូនស្រីមានប៉ាម៉ាក់តាមចិត្ត ដល់ពេលរៀបការហើយគាត់នៅតែធ្វើចរិតនោះដដែល គ្មានចេះសម្របខ្លួនតាមខ្ញុំខ្លះសោះ»។

រូបតំណាង

**២.ហាក់**៖ «ឲ្យតែមានរឿងអីតិចគាត់ "ចង់តែទៅផ្ទះខ្ញុំវិញទេ" សម្ដីដែលខ្ញុំជាប្ដីស្ទើរតែអត់ទ្រាំមិនបាន។ ម្ដងៗខ្ញុំចង់តែប្រាប់គាត់វិញថាទៅណា ក៏ទៅៗ តែព្រោះស្រលាញ់ខំអត់ធ្មត់ណាស់ រឹតតែបានចិត្តណាស់? បើនៅតែម៉ាកៗនឹងទៀត គ្រួសារខ្ញុំមិនដឹងទៅជាយ៉ាងណាទេ។ ខ្ញុំចង់ប្រាប់ទៅប្រុសៗដទៃថាបើ ចាំមើលចិត្តគ្នាឲ្យបាន យូរឆ្នាំសិន ចាំរៀបការ ព្រោះត្រឹម១ ឆ្នាំប្រហែលគេមិនទាន់បញ្ចេញអត្តចរិតឲ្យយើងស្គាល់អស់ទេ»។

៣.វិជ្ជដា៖ «ខ្ញុំទើបរៀបការបានជិត ១ ឆ្នាំ តែអាចឲ្យខ្ញុំសន្និដ្ឋានបានថាទាំងប្រពន្ធខ្ញុំ និងប្រពន្ធគេប្រហែលគិតបែបនឹងដាក់ស្វាមីដូចគ្នា។ ម៉ែប្រពន្ធគិតថាប្ដីធ្វើអីក៏ខុសដែរ ទោះយើងមិនបានធ្វើខុសក៏ត្រូវសុំទោសគេដែរ “បងគ្រាន់តែលួងអូនសោះ តើធ្ងន់ធ្ងរដល់ថ្នាក់ណាទៅ?” ខណៈដែលយើងមិនបានធ្វើ ដោយសារតែមិនចង់ឲ្យគេដឹងថាឈ្លោះគ្នា ទើបសុខចិត្តចាញ់ តែសូមផ្ដាំពាក្យបួនម៉ាត់ទៅវិញថា "កុំបានចិត្តពេក"»។

៤.ប៊ុនថា៖ «ភរិយាគ្មានថ្ងៃយល់ពីអារម្មណ៍គាបសង្កត់មួយនេះឡើយ។ ខ្ញុំសូមចែករំលែកបញ្ហាតិចចុះ ព្រោះខ្ញុំក៏ជួបដែរ។ ទោះរៀបការជិត ១០ ឆ្នាំហើយក៏ដោយ ក៏គាត់នៅតែបែបនេះដែរ ឲ្យតែមានរឿងអ្វីបន្តិចដឹងតែប្រាប់ម៉ែឪតែម្ដង។ គាត់ចាប់ផ្ដើមបានចិត្តពេលមានកូន ១ មិនពេញចិត្តអ្វីបន្តិច គាត់ដឹងតែតេទៅប្រាប់ម៉ែនៅស្រុក ហើយឪម៉ែខ្ញុំមិនចង់ឲ្យគេថាកាន់ជើងកូន ទើបចេះតែស្ដីឲ្យថាខ្ញុំមិនមើលថែប្រពន្ធបានល្អ។ ចង់ប្រាប់ថាល្មមៗបានហើយអ្នកស្រីប្រពន្ធ ការទ្រាំរបស់ប្ដីក៏មានដែនកំណត់ដែរ»។

រូបតំណាង

៥.ឧត្ដម៖ «ប្ដីៗជួបរឿងស្រដៀងៗតែគ្នាទេ។ តែរឿងខុសគ្នាមួយដែលប្រពន្ធតែងធ្វើឲ្យខ្ញុំមានសម្ពាធផ្លូវចិត្តនោះ គឺគាត់ចូលចិត្តប្រៀបធៀបគ្រួសារខ្លួន ទៅគ្រួសារគេផ្សេងទៀត។ ការរួច ៥ ឆ្នាំ គាត់នៅតែនិយាយពាក្យនេះដដែល “មើលគេណ៎ ម៉េចក៏គេល្អជាងយើងចឹង?” ព្រោះតែស្រលាញ់ទើបខ្ញុំទ្រាំ និងខំប្រឹងរកដើម្បីមកបំពេញចិត្តតែមិនចេះចប់មិនចេះហើយ។ តែគាត់នៅបន្តទៀត “កាលស្រលាញ់គ្នាដំបូង បងមិនមែនចឹងទេ” ហើយខ្ញុំសឹងតែធ្លាយមាត់ម្ដងៗដែរថា “បើពេលស្រលាញ់គ្នាដំបូង អូនមានចរិតបែបនឹងបងក៏មិនការជាមួយអូនដែរ”»៕

នេះគ្រាន់តែជាការលើកឡើងពីបុរស ៥ នាក់ ដែលមានភរិយានិយាយសម្ដីធ្វើឲ្យប៉ះពាល់អារម្មណ៍ តែពេលខ្លះស្រីៗក៏រងសម្ពាធច្រើនជាងស្វាមីដែរ!

អត្ថបទ៖ ទ្រី រ៉ាវី